في بداية القرن ال ١٧, كانت كلمة “computer” بتستخدم للإشارة عن شخص بيعمل حسابات وبحل معادلات بالرياضيات. وقتها, كان الكمبيوتر مربوط بقوانين مشدده لازم يتبعها بدون انحرافات. فلحل معادلات معقدة وكبيره ومهمه (مثل حساب تغير سرعة السفينة الفضائية عند دخولها الفضاء الجوي), كان يجتمع مجموعة من الكمبيوترات ويقسمو المعادلة الى أجزاء وكل واحد يحل جزء ليوصلو للحل بسرعه. فلم Hidden Figures بيحكي قصة تلت كمبيوترات بشريه مهمه الي بسبب ذكاءهم وقدراتهم الحسابية NASA قدرت تبعت اول سفينة فضائية.
بعد فترة, الكمبيوترات (الآلية) وصلت. صارو الناس شوي شوي يستخدموها للحسابات وتركو الكمبيوترات البشرية. واليوم, الكمبيوترات عم تتعلم وتحل مشاكل كبيره الناس ماكانت تتخيل انو كمبيوتر آلي ممكن يحلها (متل السيارات والطيارات الآليه الي بتسوق لحالها, أو الكمبيوتر الي بيغلب أحسن لاعب شطرنج بالعالم, أو تميز الأشياء\الناس بالصور, أو كتابة أفلام, قصص, أخبار … إلخ). هاي التطورات عم تزيد يوم فيوم بسبب الأبحاث العلمية, والتطورات التقنية, والكم الهائل من البيانات الي بتتخزن وبتحلل.
هاد التطور, خلى مصطلح ال “computer” الأساسي يتبدل ل human computer. والباحثين مش عاجبهم انو في أشياء صعبه كتير على الكمبيوتر انو يعملها, ففكرو وفكرو وقالو انو في أشياء البشر شاطرين فيها كتير وصعبه على الكمبيوتر, فليش ما نخلي الكمبيوتر يسأل عدد بسيط من الناس يحلولو جزء من المشكله الي هو مش عارف يحلها ويتعلم منهم ويستخدم حلولهم البسيطه لحل مشكله أكبر. هاي النظرية اسمها الحسابات القائمة عالإنسان human-based computation.
Google استخدمت هالنظرية وعملت لعبة اسمها Google Image Labeler. اللعبه بتلعبها انت وشخص تاني عشوائي. جوجل بتختار صورة عشوائية وبتبعتها الكم التنين وكل واحد منكم لازم يوصفها بكلمات قد ما بيقدر. أول ما وصفكم لنفس الصورة يتشابه, جوجل بتعطيكم نقاط تحفيزية في اللعبه وبتنتقلو لصورة تانية. هلأ الواحد بيسأل, ليش جوجل عملت هيك لعبه؟؟؟ عملتها علشان تخلي الكمبيوتر يتعلم كيف الناس بتوصف صور معينه وأول ما واحد يكتب أي من الكلمات الي بتدل على الصوره في محركها البحث, المحرك يتذكر الوصف. فمثلا وصف “تفاح أخضر” كان بيحكي عن صور فيها اللون الأخضر منتشر كتير, وكان شكل المجسم الي (لونو أخضر) شكل شي الناس بتحكيلو “تفاح”. أول مايلاقي الصور المطابقة لهاي الميزات, يفرجيها للمستخدم الي نفسو يشوف صور لتفاح أخضر. فهيك الكمبيوترات الآلية قدرت تتعلم كيف الناس بتوصف الصور بالكلام بسؤالها لمجموعة صغيرة من الناس شو وصف كم صورة.
بعض الناس شافوه هالشي مضلل وغير أخلاقي وإستغلالي للبشر. كيف تخلي كمبيوتر يعطي الناس مهمات صغيره ويستغل هالمعلومات البسيطه بدون اذنهم وعلمهم بإشي كبير. فبرأيكم هل استغلال الكمبيوتر للبشر في حل مشاكل كبيره شي غلط؟ وهل الكمبيوترات الآليه فيوم حتحل محل البشر في الشغل وبأغلب المهمات اليومية؟ شو الناس حتعمل وكيف حتقضي أيامها لو هيك صار؟ بممارسة هواياتهم الشخصيه كالعزف أو الرسم أو الشعر؟ ولا كمان الكمبيوترات حتعملو هواياتنا عنا؟
* (تحتوي هذه المشاركة على روابط تابعة. يرجى قراءة الإفصاحات للمزيد من التفاصيل).
شارك المقالة