الكيبوردات الميكانيكية: شو, كيف, ليش؟

الكيبورد شي مهم للتخاطب مع صديقنا الكمبيوتر, خاصه بعد ما صارت الروبوتات تتجَنّس. كلنا بنعرف كيف بيشتغل الكيبورد, بتكبس كبسة زِر, الكيبورد بيعرف أي زر انكبس وببعته للكمبيوتر. كل الكيبوردات هيك بتشتغل. الفرق بينهم كيف هاي الكبسة بتتفعل وبتنعرف.

في المقالة هاي ححكي عن الكيبوردات الميكانيكية. شو الفرق بينها وبين الكيبوردات العادية (الأكثر إنتشار), أنواع الكيبوردات الميكانيكية, فوائدها, وإذا لازم تشتري كيبورد ميكانيكي ولا لأ وشوية نصائح.

كيبوردات الغشاء (بالعادة مصنوع من بلاستك أو سيليكون) هي أكثر كيبوردات انتشار. الكيبوردات هاي بتشتغل بإنه الغشاء المطاطي بيكون عامل طبقة عازلة بين المفاتيح والدائرة الكهربائية. لمنك تكبس زر, الزر بيضغط الغشاء وهالشي بخلي الدائرة الكهربائية للمفتاح تتسكر وبعدها تنبعت الضغطة للكمبيوتر.

الكيبوردات الميكانيكية بتشتغل بطريقة ثانيه! تحت كل زر في مفتاح ميكانيكي كامل (switch). فَلمّنك تكبس زر, المفتاح هاد بيشتغل والدائرة الكهربائية بتخزن الأمر وبتبعثه للكمبيوتر.

المفاتيح في الكيبوردات الميكانيكية بتنقسم لثلاث أنواع: مفاتيح خطية بمقاومة ثابتة, مفاتيح ملموسة بدون صوت عالي, مفاتيح ملموسة بصوت عالي. هلأ شو الفرق بين هدول الثلاث أقسام؟؟

في المفاتيح الخطية (linear) لمنك تكبس زر, الشعور بيكون ثابت من أول ما تبدأ تكبس لين ما المفتاح الميكانيكي يتفعل. “بختصار شديد”: لمنك تكبس الزر, الزر نفسه مابيعطيلك ردة فعل. مابحكيلك أنا إنكبست, أنا إتفعلت.

هلأ لكن تكبس عالمفاتيح الملموسة بدون صوت, الزر نفسه بيعطيلك ردة فعل (كإنه بنط لفوق أول ما يشتغل المفتاح الميكانيكي تحت الزر). ردة الفعل هاي بتكون ملموسة, بتحسها بإصبعك, لهيك بتقدر تعرف متى هالزر تفعل وتوقف كتابة وتنتقل للكبس على زر ثاني.

المفاتيح الملموسة بصوت بتعطيك نفس ردة الفعل الي بتوصلك من المفاتيحة الملموسة بدون صوت. الفرق إنه هاي المفاتيح كمان بتسمعك صوت إنه هاد الزر اشتغل. مثل آلة الطباعة القديمة الي بتضل تطلع صوت (تِك تِك) كل ما تكبس على زر. لكن دير بالك لو جبت كيبورد بهيك مفاتيح لإنه الصوت بيكون عالي وممكن يسبب إزعاج للحوليك وجيرانك.

أول فايدة, وأهمها بنظري, هي إنه الكيبوردات الميكانيكية بتعطيك ردة فعل. ردة الفعل هاي بتخليك تسرع أكثر بالكتابة لإنه مابيكون لازمك تكبس الزر على الآخر لتفعله! وبهيك بتزيد من كفائتك بالكتابة.

عمر كيبوردات الغشاء المطاطي بتكون بحدود مليون لـ ٥ مليون كبسة. لو كان نوع الكيبورد شوي منيح, العمر ممكن يطول للـ 10-15 مليون كبسة. الكيبوردات الميكانيكية بتستحمل حوالي 50 مليون كبسة! فالكيبورد الميكانيكي عادي يعيش معك 10 سنين لو مش أكتر!

في الكيبوردات الميكانيكية, عندك إختيارات كثير تختار منها لدرجة إنك بتقدر تعدل كل زر على كيفك! أول شي, بتقدر تختار نوع المفاتيح الميكانيكية ونوع ردة الفعل الي بدك ياها. ثاني شي, بتقدر تختار قوة الضغط الي لازم تضغطها على الزر علشان يشتغل (في ناس بتحب تكبس على الأزرار بقوة, وناس بتحب كبساتها تكون خفيفة). ثالث شي, بتقدر تغير غطى كل زر, عكيفك كمان! رابع شي, لو خرب زر في الكيبورد الميكانيكي, بتقدر تبدل الزر لحاله ععكس الكيبوردات الثانية الي لازم تبدل الكيبورد كله. يعني حريتك بتعديل الكيبورد أوسع بكثير مع الكيبوردات الميكانيكية.

قدرة تمديد المفاتيح عبارة عن كم مفتاح بتقدر تكبس بنفس الوقت. أغلب الكيبوردات الميكانيكية الجديده بتعطيك الإمكانية إنك تكبس أي عدد من الزرار بنفس الوقت. الكيبوردات العادية بتختلف قدرتها بكم زر ممكن تستوعب فوقت واحد, بشكل عام بحدود زر للـ 6.

خاصية إنك تكبس زرار بنفس الوقت والكيبورد يتقبلها ويسجلها ويبعتها مفيده كثير للاعبين عالكمبيوتر والإنترنت. لإنه في بعض الألعب بتطلب إنك تكبس أكثر من زر بنفس الوقت وبسرعه عالية.

تنظيف الكيبوردات الميكانيكية سهل. بتقدر تشيل كل الأزرار وتغسلهم. بتقدر تستخدم فرشايه وتشيل الغبرة والوسخ تحت الأزرار وتنظف المفاتيح الميكانيكية. فما بتحتاج تفك الكيبورد لتنظفه.

بعد ما عرفت شوي عن الكيبوردات الميكانيكية وفوائدها, هل بلزمك هيك كيبورد ولا لأ؟ الكيبوردات الميكانيكية أسعارها أغلى نسبيا من الكيبوردات العادية (من 60 يورو وطالع وممكن السعر يوصل فوق ال 400 يورو!). السعر العالي بنظري هو أكثر سبب سلبي للكيبوردات الميكانيكية.

الكيبوردات الميكانيكية بتعطي الكُتّاب والطباع, المبرمجين, واللاعبين فوائد كثيره وبتسرع عليهم الكتابة وبتخليهم ينجزوا أسرع. فلو كُنت شايف إنه هيك كيبورد ممكن يفيدك, برأي بستاهل الإستثمار.

عالم الكيبوردات الميكانيكية كبير وممكن تعدل أشياء كثيره فيه. فشي مهم كثير إنك تختار كيبورد يناسب احتياجاتك. فكم نصيحة تاخذها بعين الإعتبار قبل ما تشتري كيبوردك الميكانيكي:

• جرب الكيبورد قبل ما تشتريه! روح على أقرب مركز إلكترونيات وجرب أكثر من نوع من الكيبوردات الميكانيكية الي عندهم.
• في حال ما كان عندهم تشكيلة كافية, إشتري عينية فيها أكثر من نوع من المفاتيح الميكانيكية وجربهم لتعرف أي نوع بناسبك أكثر.
• لو بلزمك زرار إضافية (زرار ماكرو) لتبرمجها تبعث أكثر من أمر بكبسة زر, دور على كيبوردات فيهم هاي الخاصية.
• في أكثر من شركة بتصنع المفاتيح الميكانيكية, الجودة والسعر ممكن يختلفو عحسب الشركة. المفاتيح الميكانيكية من تصنيع Cherry MX يعتبروا من أكثر المفاتيح إنتشار.
• لو بتكتب أحيانا بالعتمة, الكيبوردات الي فيها أضواء خلفية ورا كل زر حتفيدك.
• ممكن تقلل من مدى كبسة الزر بإضافة حلقات (O-Ring) تحت الأزرار.
• عند إختيارك للكيبورد, اهتم كثير إنه الكيبورد يكون مريح في الكتابة. حاول تقلل حركات أصابعك وإيدك بقدر الإمكان. مثلا, الكيبوردات الي مافيها الأرقام الإضافية ممكن تساعد بتقليل هيك حركة. إشتري وسادة لمعصمك وماتخلي معصمك عالطاولة حتى تقلل أي جروح وأضرار.
• … في كثير نصائح صعب أذكرها كلها بمقالة, أهم شي تأكد انك تختار كيبورد حيساعدك وحيريحك!

بتمنى هالمقالة فادتكم بمعرفة الكيبوردات الميكانيكية وإنها حتساعدكم باختيار كيبوردكم المستقبلي. إحكولي رأيكم وتجاربكم مع الكيبوردات (الميكانيكية والمش ميكانيكية) في التعليقات. لو عندكم أي نصائح مش مذكورة في المقالة, شاركوها في التعليقات حتى الكل يستفيد.

* (تحتوي هذه المشاركة على روابط تابعة. يرجى قراءة الإفصاحات للمزيد من التفاصيل).